长跑素食者：唔食肉都有力

渣马喺呢个周日（12日）就开跑，有一位素食选手话出嚟跑系要证明唔一定食肉先有力，为素食者争返啖气；有位前港队泳将选手就唔做飞鱼，挑战自己喺陆地嘅速度。

宝马汽车公司组咗队有近140人嘅BMW iRunners长跑队。队员小帕七年前患上子宫内膜癌，为咗健康，佢放弃原本钟意食嘅餐蛋麵、叉鸡饭，告别大鱼大肉，变身素食者，而家任职健身教练。佢仲话自从食素之后，皮肤好咗，肠胃好咗，连个人都正面咗添！所以今次报名跑渣马10公里赛，希望可以推广素食，同埋要话畀人知跑步又好、健身又好，其实我哋（素食者）都系普通人，同大家一样。目标系一个钟内完成十公里。

飞鱼登陆 志在参与

另一名队员、前香港游泳代表队钟国樑曾经出战亚运会同全运会，又做过奥运火炬手。今次回归陆地，一向喺香港泳坛赢开巷嘅佢话今次唔预自己赢喇，只系希望喺50分钟内跑完十公里，仲话跑步系辛苦好多啰！会流多好多汗。话就话唔争冠，但系佢都操咗八个月，仲成功减埋肥，半年内由120公斤，减到而家嘅92公斤。睇嚟视减肥为终身职业嘅港女姐妹们，都要去跑吓渣马。